FaPartSvizra!

Tge?

MachMitSchweiz! ParticipeSuisse! PartecipaSvizzera! FaPartSvizra! è in’associaziun che porscha ina plattafurma politicamain, economicamain e confessiunalmain neutrala per relevar a moda structurada l’opiniun da la populaziun svizra. 

Tut las persunas en Svizra duain avair la pussaivladad d’exprimer lur opiniun areguard temas etics e sociopolitics ed era da vegnir percepidas.

L’associaziun è libra da valitaziun. Ella rimna las opiniuns, na las furma però betg.

Co?

Ina gruppa d’experts da 40 commembras e commembers elegida da la suprastanza da l’associaziun decida davart ils temas. Las expertas ed ils experts vegnan tschernids da tut las classas socialas, la gruppa d’experts represchenta damai la populaziun svizra.

La gruppa d’experts tscherna in tema, al structurescha en furma da dumondas, messadis ed ipotesas, uschia ch’igl è pussaivel da relevar las opiniuns e da metter a disposiziun material da basa utilisabel statisticamain.

Il tema vegn publitgà en la structura elavurada sin ina plattafurma.

Commembras e commembers da l’associaziun che vulan exprimer lur opiniun e/u ramassar las opiniuns pon s’annunziar sco ambassaduras ed ambassadurs. Els rimnan opiniuns – saja quai durant ina saira da jass, en famiglia, a chaschun d’ina excursiun cun la firma, en il club da sport – ed annunzian las opiniuns ramassadas sin la plattafurma. Per il process da rimnar opiniuns fixescha l’associaziun directivas eticas.

La gruppa d’experts elavura a maun da las opiniuns rimnadas material da basa statistic.

L’entir process da relevar las opiniuns e da crear material da basa statistic è transparent ed accessibel per in e scadin.

Pertge?

Dapi onns sa participescha mo ina minoritad als process democratics, dumondas impurtantas na vegnan betg tematisadas.

I dovra la pussaivladad da pudair exprimer l’atgna opiniun a moda libra e nuninfluenzada. Ultra da quai ston las opiniuns vegnir rimnadas là, nua ch’i vegn discutà.

En quella furma vegnan intimadas discussiuns objectivas cun temas sco l’etica, la societad, la politica, il socialesser, las innovaziuns e visiuns. Quai rinforza la democrazia directa e gida a preparar il fundament per la Svizra da damaun.

Tgi profita?

Tut las persunas che vivan en Svizra. Las medias, la politica, ils uffizis, la populaziun pon trair a niz il material da basa disponibel libramain. Empè da restar fitgà en ils extrems e da sa bloccar cun situaziuns da gea/na, hai plazza per tschertgar soluziuns a moda directdemocratica.

Tgi po far part?

Daventar commember da l’associaziun pon tut las persunas che vivan en Svizra, independentamain da lur naziunalitad e da lur status da dimora. La contribuziun da commember annuala munta a CHF 20.–. L’adesiun a l’uniun succeda cun pajar la contribuziun da commember e vala per l’onn chalendar current.

I na dat naginas obligaziuns, nagina responsabladad persunala. La commembranza na vegn betg prolungada automaticamain ed i n’è betg necessari da la visar.

Tut las persunas ed organisaziuns han la pussaivladad da daventar fauturas.

Annunzias via: Inscripziun.